16 ka adlaw na lang ang nabilin antes ang adlaw sang eleksyon kag nagalaum ang 80 anyos nga si Mel Carreon nga makakuha sang pwesto sa konseho sa syudad sang Iloilo paagi sa iya nga pagpangaluyag sa mga informal settlers, apisar nga wala siya sang daku nga budget.
Sa interview sang Bombo Radyo kay Carreon, iya ginpahayag nga nagasakay siya sa tricyle kag nagapang-barangay agud nga bisitahon ang iya ginapahayag depressed areas.
Suno kay Carreon, nagapanguna sa iya nga legislative agenda ang ikaayo sang mga senior citizens, apang wala na sini ginpahayag kun ano pa ang iban nga mga plano bangud suno sa iya, ‘basi kopyahon sang iya mga kasumpong.’
Dala man ni Carreon sa iya pagpangampanya ang lain-lain nga duag sang props, bangud suno sa iya, wala siya sang ginasuportahan nga presidential candidate.
Kilala si Carreon sa syudad sang Iloilo bangud nagapadalagan ini kada eleksyon apang wala man nagadaog. Halin 1992, nagatilaw si Carreon sa pagpadalagan. Ini na ang iya ika-11 nga pagpasimpalad.
Sa 11 straight elections sa syudad, ginapahanugutan sang Comelec ang kandidatura ni Carreon bangud sang iya nga mga maathag nga plataporma kag mga adbokasiya.
Lakip sa iya una nga ginpangplastar amo ang pagpanubo sa presyo sang water utility sa syudad, pagbutang sang dugang nga stalls sa mga comfort rooms, kag pag-review sa mga building ordinances. ##
