Maga-umpisa na ang 2025-26 season sang National Basketball Association (NBA) subong nga adlaw.
Matabo ini matapos ang 120 ka adlaw kasunod sang kadalag-an sang Oklahoma City Thunder sa finals batok sa Indiana Pacers.
7:30 subong nga aga (oras sa Pilipinas), magaatubangay sa Paycom Center sa Oklahoma ang team sang Thunder kag ang Houston Rockets.
Magapanguna sa defending champions ang reigning Most Valuable Player (MVP) nga si Shai Gilgeous-Alexander samtang debut naman sang superstar nga si Kevin Durant sa Rockets.
10:00 naman subong gihapon nga aga, magasambuwa ang Los Angeles Lakers kag ang Golden State Warriors sa Crypto.com Arena sa Los Angeles, California.
Indi maka-upod ang 40-anyos nga superstar nga si LeBron James sa imbukada nga hampang bangud sa iya nga injury. Ini na ang iya record-breaking nga 23rd season sa liga.
Manguna sa Lakers si Luka Doncic nga amo ang iya una nga full season sa Los Angeles matapos ang blockbuster trade nagikan sa Dallas Mavericks sang Pebrero.
Sa Warriors, yara ang 37-anyos nga si Stephen Curry nga maga-umpisa sang iya ika-17 nga season sa NBA, kun sa diin makaupod man sini ang 36-anyos nga si Jimmy Butler kag 35-anyos nga si Draymond Green.
