Nagabaha ang suporta sang mga Ilonggo para kay Alexie Mae Caimoso Brooks inoras antes ang pormal nga pagsugod sang coronation night sang Miss Universe Philippines 2024, Mayo 22.
Sa iya hometown sa Leon, Iloilo, nag-preparar ang local government unit (LGU) sang libre nga public viewing sa plaza sang banwa agud malantaw sang iya kasimanwa ang ginabantayan nga performance sang Filipino-American beauty queen sa finals sang national pageant.
Nagpanguna naman si Leon Mayor Ma. Lina Cabana-Holipas kag si Second District Rep. Michael Gorriceta sa mga opisyal nga nagbyahe gid padulong sa Metro Manila para makalantaw sang live event.
Ang Buga Central Elementary School naman, iban nga LGU officials, kag iban pa nga pageant enthusiasts ang nag-post sang videos kag pictures para suportahan ang ginabansagan nga “People’s Queen.”
Sa bulig sang boto sang mga fans, sulod si Brooks sa finalists sang tanan nga challenges antes ang coronation night kag nalakip man sa Top 3 ang iya “Ugto-Ugto” performance sa Best in National Costume.
53 ka mga kandidata ang magapaindis-indis subong nga gab-i para makabulos sa korona ni reigning queen Michelle Dee.
Isa man ini ka interesante nga edisyon sang pageant bangud sa pila ka butang: ang delegates ang ginpili paagi sa Accredited Partners Program, may mga kandidata nga nagatiglawas sa overseas Filipino communities, kag wala na sang age restrictions para sa mga magapasakop.
