Lunsay ginaako nanday incumbent US President Donald Trump kag Democratic candidate Joe Biden ang kadalag-an sa pagka-presidente sa election sa Estados Unidos.
Apisar wala pa nabaton ang pinal nga resulta sang boto, gindeklarar ni Trump sa iya mga supporters nga Republicans nga daug na siya apang kadungan sini, iya ginpahayag nga magapadulong siya sa Korte Suprema agud ipauntat ang pag-isipay sang boto.
Sa iya speech sa sa ceremonial East Room sang White House, gintawag ni Trump nga ‘fraud’ kag kahuy-anan sa pungsod ang nagakatabo sa eleksyon bangud may yara siya sang ginakabig nga mga iregularidad.
Nahibaluan nga antes ang Nobyembre 3, masobra na sa 100 million ang nagboto bangud sa kahangawa nga malatnan sang COVID-19 kun personal nga magpadulong sa polling stations.
Dismayado si Trump bangud ‘on road’ na siya sa iya kadalag-an apang nagpabor sa Democrats ukon kay Biden ang Republican-friendly state nga Arizona.
“We were getting ready for a big celebration. We were winning everything and all of a sudden it was just called off. This is a fraud on the American public. This is an embarrassment to our country. We were getting ready to win this election. Frankly, we did win this election,” pahayag ni Trump.
Samtang sa speech naman sang challenger nga si Joe Biden sa Wilmington, Delaware, iya ginpahayag nga ‘on track’ siya sa pagdaug sa eleksyon.
Ini man ang pahayag sang Democratic presidential candidate apisar wala sa ila ni Trump ang nakadangat sa requisite nga 270 Electoral College votes agud masiguro na ang posisyon.
“I’m optimistic about this outcome. Keep the faith, guys, we’re going to win this, ” pahayag sang anay bise-presidente.
Sa subong, may yara na si Trump sang 213 electoral votes samtang may 238 naman si Biden kag balantayan sa subong kun kay sin-o magapabor ang nabilin nga battleground states.
May kaangtanan diri, ang Bombo Radyo Philippines padayon nga nagadul-ong sang “The Election of an American President – The Race to 270 Electoral Votes” nagikan Bombo Radyo Iloilo International News Correspondents sa 50 ka mga estado sang United States of America.
Ang tagsa ka mga boto makit-an LIVE State by State sa Bombo FB Live tubtob malab-ot ang 270 Electoral proclamation of votes
