Kun ikaw isa ka solid Directioner, mahimo nga isa ka man sa naghandum nga makit-an liwat ang mga miyembro sang One Direction nga mag-updanay kag magkanta nga daw kaangay nga wala lamang nag-disband sang 2016.
Antes magtakop ang 2024, natabo ang ila pag-updanay liwat — indi sa entablado — kundi sa funeral sang anay One Direction star nga si Liam Payne.
Lunsay nagasuksok sang itom sanday Louis Tomlinson, Harry Styles, Zayn Malik, kag Niall Horan sang nagkadto sa funeral ni Liam sa St. Mary’s Church sa Amersham sa Buckinghamshire nga malapit sa London, Britain.
Nag-abot sa simbahan ang lungon ni Liam nga may floral tributes nga nakabutang nga “Son” kag “Daddy”.
Nagtalangison naman ang ginikanan ni Liam kag gin-updan sang iya duha ka utod, girlfriend sini nga si Kate Cassidy, kag iya former partner nga si Cheryl Tweedy nga amo man ang iloy sang bata ni Liam nga si Bear.
Lakip man sa nagkadto amo ang actor kag TV host nga si James Corden kag si Simon Cowell nga amo ang music mogul nga nagtukod sang One Direction paagi sa X Factor talent show sa Britanya sadtong 2010 antes nagbantog ang grupo kag nahimo nga isa sa best selling boy bands of all time.
Kilala sila sa hit singles kaangay sang “Night Changes”, “What Makes You Beautiful,” “Live While We’re Young,” “Best Song Ever,” “Story of My Life”, kag iban pa.
Oktubre 16 sang napatay si Liam matapos nahulog gikan sa balkonahe sa ikatatlo nga panalgan sang Casa Sur Hotel sa Buenos Aires nga kapital sang Argentina.
31-anyos pa lamang ang British star sang tion nga ginbawian sang kabuhi bangud sa “multiple traumas” kag “internal and external hemorrhaging” base sa post-mortem examination.
Antes ang iya kamatayon, nakatawag pa ang hotel staff sang duha ka beses sa emergency services kaangot sa ila guest nga natam-an sa epekto sang drugs kag alcohol kag naga-wild sa isa ka hotel room.
Sunod nga ginkumpirma sang mga imbestigador nga yara si Liam sa “episode of substance abuse” antes ang insidente.
Matapos na-detect ang alcohol, cocaine kag prescription antidepressant sa lawas sang music star, naghulag ang Argentine prosecutors agud pasakaan sang kaso ang tatlo ka mga tawo nga naangot sa paghatag sa iya sang iligal nga droga kag pag-abandona sa iya kasunod sa iya kamatayon.
