Nag-umpisa na subong nga adlaw ang opisyal nga 90-day campaign period para sa national elective candidates para sa 2025 midterm elections.
64 nga mga kandidato sa pagka-senador kag 155 naman sa party-list groups ang subong subject na sa mga regulasyon nga gin-set sang Commission on Elections (Comelec).
Sa bahin ni Comelec chair George Erwin Garcia, nagpahanumdom ini sa mga kandidato nga istrikto nga magsunod sa pagsulundan bilang pagpakita sang pagtahod. Isa diri suno sa natungdan ang indi pagkampanya sa tungang gab-i ukon sa kaagahon bilang respeto man sa mga tawo nga nagapahuway.
Indi man pwede maghatag sang aid sa mga kandidato ang foreign entities.
Iga-monitor man sang poll body ang campaign spending sang kandidato paagi sa pag-require sa ila sa pagpasa sang statement of contribution and expenditures (SOCE) kun matapos na ang elections.
Dapat man nga sundon ang limit sa kadakuon sang physical election paraphernalia base sa kun ano ang nakasaad sa Fair Election Act.
Gina-abisuhan man ang mga kandidato nga indi pwede mag-display sang paraphernalia sa private properties nga wala sang pahanugot sang tag-iya sang propiedad, kag indi man pwede sa pampubliko nga mga lugar nga indi authorized common poster area.
Matandaan nga may resolution nga ginpaguwa ang Comelec nga nagapahanugot sa law enforcers nga magpatigayon sang pag-aresto bisan wala sang warrant of arrest kun may makit-an nga nagabaligya kag nagabakal sang boto.
Subong man nga Peb. 11 nag-umpisa ang Comelec sa “Oplan Baklas” ukon ang pagkakas sang illegal campaign materials nga nagalapas na sa size limit nga ginhatag sang poll body kag gintapik sa indi man poster areas.
Sa Abril 17 kag Abril 18, may break anay sa kampanya para sa Semana Santa.
Sa pihak nga bahin, sa Marso 28 naman maga-umpisa ang 45-day campaign sang mga magapapili sa local elections.#
