Ginahingyo sang Commission on Elections (Comelec) Region 6 indi lamang ang mga kandidato kundi pati ang mga campaign leader kag mga supporter nga magsunod gid sang istrikto sa mga regulasyon sang poll body kaangot sa pagpangampanya.
Subong nga Martes, Pebrero 11, opisyal nga nagsugod ang 90 ka adlaw nga campaign period para sa national elective positions ukon para sa magapadalagan sa pagka-senador amo man ang party-list groups.
Suno kay Atty. Dennis Ausan, director sang Comelec 6, dapat nga ibutang lamang ang posters sa designated common poster areas. Pwede man ini sa private properties apang dapat nga may yara sang pahanugot halin sa tag-iya.
Dugang sa pagsulundan, indi dapat maglapaw sa two feet by three feet ang size sang poster ukon campaign material. Kun may makit-an nga mas daku nga poster ipaanggid sa limit, i-kumpiskar ini sang Comelec kag i-report sa Law Department para sa nagakaigu nga disposisyon.
72 oras antes ang official nga pagsugod sang kampanya, dapat nga nakakas naman ang campaign posters nga wala sa designated areas kaangay sang ginpangbutang sa mga poste, kahoy, waiting sheds, kag iban pa nga public structures.
Magluwas diri, ang tanan nga campaign posters ang dapat nga nagalakip man sang phrase nga “Paid by” ukon “Donated by” para mabutang kun sin-o ang naghatag sang finance para sa material.
Ginplastar man ni Ausan ang ruling sang Korte Suprema nga indi ma-regulate sang Comelec ang posters sa pribado nga propiedad basta may yara sang pahanugot halin sa tag-iya.
Bangud subject na ang mga kandidato sa national elections sa Comelec rules and regulations, ang anuman nga paglapas sa Fair Election Act ang mahimo mag-resulta sa election offenses nga mahimo masilutan sa idalom sang Section 264 sang Omnibus Election Code (OEC).
Mahimo mapreso ang may sala sang isa-anum ka tuig, ma-disqualify sa pagpungko sa gobyerno, kag mahimo makakasan sang kinamatarong sa pagboto.
ILOILO CITY: DESIGNATED COMMON POSTER AREAS
Nauna na nga gin-release ang lista sang designated common poster areas para sa Iloilo City:
- City Proper – sa Plaza Libertad – J.M. Basa Street, sa atubang sang Coffee Break kag Masonic Temple
- Arevalo – sa Plaza Villa – Rizal Street, corner Osmeña Street, pakadto sa Arevalo Church, sa atubang sang Avanceña/Rizal Park.
- Jaro – sa Plaza Jaro – Rizal Street, corner Iloilo East Coast Road, sa atubang sang Land Bank Jaro pakadto sa Ledi Supermart.
- La Paz – sa Plaza La Paz – Huervana Street, halin sa corner Burgos Street pakadto sa corner Jereos Street, sa atubang sang La Paz Police Station kag La Paz Elementary School.
- Lapuz – sa Bo. Obrero Plaza – Dahlia Street, sa atubang sang Bo. Obrero Catholic Church.
- Mandurriao – sa Plaza Mandurriao – Oñate De Leon Street, sa atubang sang 7-11 Convenience Store pakadto sa corner Iloilo City-Aleosan Road.
- Molo – Plaza Molo – sa atubang sang Molo Caltex Station kag Molo Mansion sa Locsin Street.
