“There isn’t going to be an impeachment,” – Top Senate Republican kasunod sang withdrawal sang US troop sa Afghanistan

Wala sang may matabo nga impeachment kay US President Joe Biden kasunod sang withdrawal sang mga US troops gikan sa Afganistan.

Ini ang pagpati ni Senate Republican Leader Mith McConnell bangud lunsay Democrats ang naga-kontrol sang House kag Senate.

Suno sa iya, ang mas maayo nga himuon amo nga panumdumon sang maayo kun sin-o ang dapat nga botohon sa tion sang eleksyon.

Matandaan nga 13 ka mga US service members kag masobra 170 ka mga sibilyan ang napatay sa suicide bombing attack sa Kabul airport sa diin gin-ako man sang Islamic State Khorasan ukon ISIS-K nga sila ang may kahimo-an.

Pila sa mga republicans kaangay nanday Tennessee Sen. Marsha Blackburn kag South Carolina Sen. Lindsey Graham ang nagpahayag nga nagakadapat nga mag-resign ukon magpangatubang sang impeachment si Biden.

Madamo sang mga kritisismo ang ginahaboy sa Presidente sa diin nagapati ang kadam-an sa mga Republicans nga ang withdrawal gikan sa Afghanistan ang nagtuga sang “humanitarian disaster” kag nag-engganyo pa sang mga terorista.