Malipayon ang aktor nga si Cesar Montano para sa iya anay asawa nga si Sunshine Cruz nga subong kumpirmado na nga karelasyon sang gambling tycoon nga si Atong Ang.
Suno kay Cesar, kun malipayon si Sunshine, buot silingon sini, malipayon man ang ila mga anak — kag bilang amay, kalipayan man niya ini.
Nagpahayag man ini nga saludo siya kay Atong sa iya kaisog sa pag-ako sa iya relasyon kay Sunshine.
“Saludo ako kay Atong for being man enough to admit his relationship with Shine. I sincerely wish that they will live happily ever after. They both deserve to be happy. When Shine is happy, that means our three daughters are happy, too. And as a father, my daughters’ happiness is mine as well,” suno sa 62-anyos nga actor.
Nahibaluan nga 2018 sang gin-annul ang kasal nanday Cesar kag Sunshine, kag subong mag-abyan gihapon sila kag makit-an nga naga-upod sa pila ka mga okasyon nga kinahanglan sila sang ila mga bata nga sanday Angelina, Chesca, kag Sam.
Sini man nga semana sang nakumpirma ang relasyon nanday Atong kag Sunshine matapos nga naglapta ang videos sang ila paghalukanay.
Antes sini, may anum ka tuig man nga relasyon si Shine sa pulitiko nga si Macky Mathay apang gin-anunsyo ang ila pagbulagay sang Septyembre 2022.
Sa pihak nga bahin, na-link man anay si Atong sa aktres nga si Gretchen Barretto apang ginpahayag anay ni Gretchen nga mag-business partner lamang sila.
