Nagdepensa si US President Donald Trump matapos ini gin-ulan sang pagpakamalaot bangud sa pag-post sang picture kun sa diin nakasuksok siya sang bayo sang Santo Papa.
Suno kay Trump, lahog-lahog lang ang AI-generated image. Pahayag pa sini, indi man mga Katoliko ang nagpangakig kundi ang mga fake news media.
“They can’t take a joke,” suno kay Trump samtang naga-atubang sa reporters sa Oval Office. Dugang sini: “You don’t mean the Catholics, you mean the fake news media … the Catholics loved it.”
Dugang sini, indi siya ang naghimo sang picture kag indi man siya ang nagbutang sini sa Truth Social media platform nga amo ang naglapta online. Ginpahayag man ni Trump nga naham-ot pa gani si First lady Melania Trump sa picture.
“I have no idea where it came from,” dugang sini. “Maybe it was AI. But I know nothing about it. I just saw it last evening. Actually my wife thought it was cute. She said, isn’t that nice?”
Naglahog man siya nga indi man kasado ang mga Santo Papa gani nga mabudlayan gid siya nga makuha ang amo nga pwesto.
“Actually I would not be able to be married though,” suno kay Trump. “That would be a lot. I’d have to — to the best of my knowledge, popes aren’t big on getting married, are they? Not that we know of, no.”
Nahibaluan nga sa picture nga na-share sang nagligad nga semana, suksok ni Trump ang traditional Catholic mitre, cross kag white cassock.
Nahibaluan nga nagtambong man si Trump sa lubong ni Pope Francis kag masako subong ang College of Cardinals sa pagpreparar sa pagpili sa bag-o nga Santo Papa para mangin lider sang Simbahang Katolika.#
