ILOILO CITY – Nagviral sa social media ang isa ka Public Safety and Transportation Management Office (PSTMO) personnel matapos nakuhaan sang video sang isa ka netizen nga nagasaot ini sa dalanon sang Hibao-an, Mandurriao, Iloilo City.
Ang PSTMO personnel amo si Ricaredo Quiman, 40. Sa exclusive interview sang Bombo Radyo kay Sofia Genson, ang netizen nga nakakuha mismo sang viral video, iya ginpahayag nga breaktime niya sa trabaho sang nalabayan niya sa dalanon ang PSTMO personnel nga nagasaot.
Ginkalipay ni Genson, kaupod ang iya mga ka-trabaho, ang positive vibes nga gindala ni Quiman.
Suno kay Genson, nagsanto man sa viral nga Tiktok music nga gingamit niya sa pagvideo, ang mga ‘the moves’ ni Quiman.
Dugang pa niya, naghatag sang dako nga inspirasyon si Quiman sa diin sa tunga sang kakapoy sa trabaho, may pamaagi ini nga magpalapta sang ‘good vibes’ sa mga tawo sa palibot.
THINK POSITIVE LANG
Nagapati ang PSTMO personnel nga pinaagi sa positibo nga panan-awan sa kabuhi, malampuwasan sang tanan ang COVID-19 pandemic.
Sa exclusive interview sang Bombo Radyo kay Ricaredo Quiman, iya ginpahayag nga luyag lang niya nga maghatag sang kalipayan sa palibot niya pinaagi sa pagsaot sa tunga sang iya trabaho.
Suno kay Quiman, natun-an niya ang iya ‘the moves’ sang nagaeskwela pa lang siya sa diin nangin isa man siya ka dancer.
Panugyan ni Quiman sa publiko:
”Biskan may pandemya ta, think positive lang, indi ta pagdumdumon ang problema ta bangud sa pandemya.”
