Nag-abot na sa Pilipinas ang dugang nga 15 ka Pinoy nga naipit sa kinagamo sa Sudan.
Ini ang ikatatlo nga batch sang repatriates halin sa amo nga pungsod.
Malawig ang byahe sang Filipino repatriates halin sa Port Sudan, nagtabok sa Red Sea, nag-agi sa Jeddah tubtub nga nakaabot sa Pilipinas.
Ginpakigbahin sang isa ka repatriate nga indi basta-basta ang sitwasyon subong sa Sudan bangud nagagamit na ang magkasumpong nga military factions sang jet plane kag heavy artillery rason nga tuman ka tunog ang mga pagsigabong.
Suno sa Department of Foreign Affairs, as of May 1, 32 ka Pinoy pa lang ang napapauli halin sa Sudan samtang 616 naman ang na-evacuate halin sa Khartoum nga amo ang kapital nga syudad kag sentro sang away.
Ginpasalig man sang ahensya nga papaulion man sa labing madali nga tion ang 575 pa nga mga Filipino repatriates nga apektado sang amo nga gamo. ##
