Ginlutos ni former world champion Mark “Magnifico” Magsayo ang Irish boxer nga si Feagal McCrory sa iya debut sa lightweight division kag sa idalom sang bag-o nga promotional firm.
Nahimo ini sang Pinoy boxer paagi sa technical knockout sang ginpauntat sang corner sang kasumpong ang hampang sa 5th round.
Ginpatigayon ang sambuwa sa Las Vegas, Nevada, USA.
Ini nga 30-anyos nga tumandok sang Bohol ang napaidalom na subong sa Zuffa Boxing nga gina-uyatan sang UFC CEO kag promoter nga si Dana White.
May yara na siya sang pro-record nga 29 wins kag 2 losses nga may 19 knockouts.
Ang former world title challenger naman nga Irish boxer ang nag-us-os sa 17-2 record nga may 9 knockouts.
Si Magnifico amo anay ang WBC featherweight champion matapos ginlutos si Gary Russell Jr. paagi sa majority decision sang Enero 2022, apang nakuha sa iya ang titulo matapos napaslawan sa title defense batok kay Rey Vargas.
Sa post-fight interview, ginlaragway ni Magnifico ang lightweight division bilang iya division kag iya “prime.”
“Big difference, the weight, the training camp, the sparring, and everything,” pahayag sang Pinoy boxer. “I’m strong, powerful. This is my division. This is my prime. This is my weight. Let’s go!”
Nahibaluan nga isa si Magnifico sa ginalantaw nga magaatubang sa unbeaten boxer nga si Andres Cortes (25-0, 13 knockouts) nga amo ang naglutos kay Eridson Garcia sa headliner sang eight-fight card.#
