ILOILO – Gin-ako sang anay chairperson sang Makabagong Alyansang Makabayan (BAYAN)-Panay nga si Jeffrey Celiz nga siya ang nag-gwa nga si Ka Eric Almendras kag nagtindog bilang whistleblower sang military batok sa Community Party of the Philippines-New People’s Army (CPP-NPA).
Si Celiz ang nagserbe man anay bilang executive assistant ni former Iloilo City mayor Jed Patrick Mabilog.
Sa exclusive interview sang Bombo Radyo kay Celiz, iya ginpahayag nga matapos ang malawig nga tion nga pagka-miembro sa CPP-NPA-NDF (National Democratic Front), nagatrabaho na siya subong sa gobyerno.
“Ang mga natabo sa akon, ang pagkadala ko sa narcolist nga ginlawag ni President Duterte, ang sabat ko direkta sa Bombo Radyo: I was part of a government project. Because I was a part of goverment, ilabi na sang time nga nadala ako sa narcolist, damo ako sang gin-obra that is covered of confidentiality as nature of my job as consultant for peace and security,” pahayag ni Celiz.
Ginwaragwag ni Celiz nga narecruit siya sang CPP-NPA-NDF sang nagaeskwela siya sa West Visayas State University – Main Campus.
Nagsugod siya bilang miyembro sang College Editors’ Guild of the Philippines sang March 1988 bangud suno sa iya, kabahin siya sang university publication sang nasambit nga unibersidad.
Pagkatapos sini suno sa natungdan, sang 1991, ginrecruit siya sang Kabataang Makabayan ukon KM nga suno sa iya ‘underground kag member sang NDF’.
“Abi ko amo lang na akon padulungan, gali ya kay mangrecruit man ko sang pareho ko nga kabataan. Kag indi lang ko ginrecruit sang KM, ginrecruit ako sang Communist Party of the Philippines. Kaduha ako ka beses nga nagsumpa nga isulong ang armado nga grupo.”
Suno kay Celiz, nanghagad pa siya sang iban nga student-leaders kag ang pinakadaku nga accomplishment suno sa iya amo ang pagpanguna sa Erap Resign Movement.
Sang amo nga tion, si Celiz amo ang Bayan chairman sa isla sang Panay.
“It was not a random spontaneous action. It was a pre-meditated, calibrated and well-planned systematic broad alliance operation led by a Communist Party. Bangud sina, napatalsik si Erap.”
Nangin kabahin siya sang underground sang 2002-2008 suno sa natungdan kag sini nga tion suno sa iya, nakilala niya kag napamatud-an nga kabahin sang NPA si Ella Colmenares, utod sang aktres nga si Angel Locsin.
NGAA NAG-GWA SA PUBLIKO SI CELIZ UKON SI KA ERIC?
“Ang pag-gwa ko… death sentence bala ini para sa akon. Sa bahin sang CPP-NDF, pagapatyon bala ako? Yes. Sigurado ako. Gina-expect ko ina in a matter of time. Dead man walking ako. Bal-an sang asawa ko ang paggwa ko, indi? Gahibi siya? Gakabalaka siya? Pati mga anak ko? They are. They are deeply and seriously very worried,” pahayag ni Celiz.
“Amo ni ang tama nga obrahon ko kag dapat obrahon sa madugay na nga panahon. Redemption ko ini sa madamo nga kabataan nga ginguba ko ang future kay gin-recruit namon… sa madamo nga kabataan nga ang pagmiembro nila sa youth organization nga ang napadulungan nangin kabahin sang madinuguon, pagpamatay, violence..”
Ang paggwa ni Celiz sa publiko ang kasunod man sang hangkat sang publiko kay National Task Force to End Local Communist Armed Conflict Lt. Gen. Antonio Parlade Jr. nga pamatud-an nga may kahilabtanan sa NPA ang Gabriela Youth kag iban pa nga mga cause-oriented groups.
