ILOILO CITY – Ginhingadlan ni Iloilo City Lone District Cong. Jerry Treñas ang tiayon ni Iloilo City Mayor Jose Espinosa III nga amo ang nagapamuno sa pagpalapta sang fake news batok sa iya.
Ini ang may kaangtanan sa reaksyon sang mamalidha tuhoy sa nagalapta nga huring-huring batok sa iya.
Sa interview sang Bombo Radyo kay Treñas, iya ginpahayag nga si Mrs. Gina Sarabia-Espinosa kag si certain JR Delfin amo ang naga-uyat sang mga fake account kag nagapalapta sang sala nga impormasyon batok sa iya.
Sa iya nga pagkahibalo suno kay Treñas, si Delfin ang isa sa anay ginasaligan ni dismissed Iloilo City Mayor Jed Patrick Mabilog.
Kadungan sini, nagpaandam si Treñas nga iya nga ipausisa sa National Bureau of Investigation (NBI) agud nga mahibalu-an ang IP address sang fake accounts.
Ginpahayag sang mamalidha nga nagatipon pa siya sang mga pamatuod agud nga makapasaka sang kaso nga cyberlibel batok sa mga nagapalapta sang sala nga impormasyon batok sa iya.
Iloilo City Lone District Cong. Jerry Treñas
Samtang, ginbalik ni Iloilo City Mayor Jose Espinosa III ang tinaga nga ‘fake news’ kay Iloilo City Lone District Cong. Jerry Treñas.
Sa interview sang Bombo Radyo kay Espinosa, iya ginpahayag nga indi na kun tani pagdalahigon ni Treñas ang iya tiayon kag ang iban pa niya nga himata sa away nila nga magbilas.
Sa pagkamatuod suno kay Espinosa, ang pagpatu-pato ni Treñas sa iya tiayon nga si Gina Sarabia-Espinosa nga amo ang nagapalapta sang fake news paagi sa dummy account ang maathag nga pagpatalang sa publiko.
Sa pagkamatuod suno sa alkalde, mismo si Treñas ang nagapalapta sang ‘fake news’ bangud nga iya na sadto nga ginpasalig ang tanan nga indi na magbalik liwat sa pulitika apang wala man ini natuman.
Sa baylo nga magpamantay sa pamilya sang iban, ginpahayag sang natungdan nga mas maayo nga bantayan na lang sang mamalidha ang kaugalingon nga pamilya.
Iloilo City Mayor Jose Espinosa III
