ILOILO CITY–Wala sang may natabo nga buybust operation sa tunga sang mga otoridad kag ni Punong Barangay Rex Lagura sang Aldegue, Sara, Iloilo bag-o napatay ang opisyal.
Sa exclusive interview sang Bombo Radyo kay Anita Lagura, 50 anyos kag tiayon sang Punong Barangay, iya ginpahayag nga wala sang kamatuuran ang gina-akusar sa ila sang Sara Municipal Police Station kag sang Provincial Drug Enforcement Unit (PDEU).
Ang matuod nga natabo suno kay Lagura amo nga ginpwersa sa mga otoridad nga sudlon ang ila balay sa diin guba ang ila mayor nga pwertahan kag ginsulod sila sa ila kwarto.
Naka brief pa si Punong Barangay Lagura samtang naka panty naman ang tiayon sang natabo ang insidente.
Dugang pa ni Ginang Lagura, gindala sa sala ang barangay official kag ginpabilin naman siya sa sulod sang kwarto.
Diri kag nakabati na lang si Ginang Lagura sang asud-asud nga lupok kadungan sang pagsinggit sang mga otoridad sang tinaga nga “nagbato”.
Ginputos nila sang habol si Punong Barangay Lagura kag gindala sa ospital samtang ang tiayon naman ang gindala sa Sara Municipal Police Station.
Ginpanindugan man ni Ginang Lagura nga wala nagabaligya sang iligal nga droga ang iya bana kag wala man sila sang armas.
Samtang, nagalaom naman si Ginang Lagura nga mahatagan sang hustisya ang kamatayon sang iya bana.
Ginpanindugan man niya nga planted ang droga nga nakuha sa iya bana
Nahibaluan nga si Punong Barangay Laguya ang anay head guard sa isa ka security agency samtang ang iya tiayon ang utility worker  sa talatapan ni Sara Mayor Ermelita Salcedo.