Gin-anunsyo sang Philippine Basketball Association (PBA) nga gin-set sini sa P49 gid lamang ang presyo sang ticket para sa upper box kag above sections sa Araneta Coliseum para sa imbukada nga adlaw sang Season 49 nga natalana buwas, Agusto 18.
Suno kay Board chairman Ricky Vargas, kabahin ini sang selebrasyon sang liga sang ila ika-49 nga tuig.
Apang gin-athag sini nga first-come, first-served basis ini nga tickets.
Sa opening day, una nga patigayunon 4:00 sa hapon ang 48th season Leo Awards kun sa diin iga-anunsyo ang MVP, Rookie of the Year, Mythical Teams, All-Defensive Team, Most Improved Player, kag Samboy Lim Sportsmanship award.
Magasunod ang pormal nga opening ceremonies kun sa diin balantayan ang traditional parade of teams kaupod ang ila mga muse.
Lakip sa nakumpirma na amo ang Filipino-American gymnast, two-time Southeast Asian Games gold medalist, kag Paris Olympian nga si Alleah Finnegan nga ginpili sang Meralco Bolts.
Ginhingadlan man sang Phoenix Fuel Masters ang ila muse nga amo ang Alas Pilipinas stalwart, Creamline star, former Premier Volleyball League (PVL) Most Valuable Player (MVP), kag multi-awarded best outside spiker nga si Jema Galanza.
Pagkatapos sang opening ceremonies, masaksihan na ang opening game sa Governors’ Cup sa tunga sang Magnolia Hotshots kag reigning all-Filipino champions nga Meralco Bolts.#
