Nagmandu na si Iloilo City Mayor Jerry Treñas sa Public Safety and Transportation Management Office (PSTMO) kag sa iban nga concerned offices nga i-check sang ma-id-id ang Ticud Terminal sa Lapaz, Iloilo City agud mahibaluan kun pwede maka-operate liwat.
Ini kasunod sang mga hingyo sang mga drivers kag pasahero nga buksan liwat ang amo nga mga terminal.
Diri nga terminal nagadiretso ang mga jeep nga may byahe pa-Dumangas kag diri man nagahulat ang mga van nga nagabiyahe sa Lemery via San Rafael kag Barotac Viejo.
Sa interview sang Bombo Radyo kay Mr. Jeck Conlu, head sang PSTMO, iya ginpahayag nga kadtuan ini sang mga opisyal sa masunod nga semana agud ma-review kun na-meet sang terminal ang standards nga set na para sa modernization program.
Matandaan nga antes pa man ginpatuman ang Local Public Transport Route Plan (LPTRP) sa Iloilo City sang Hunyo 12, nag-inspect ang Land Transportation Franchising and Regulatory Board (LTFRB) Region 6 sa mga terminal kag nakit-an suno kay Conlu nga non-functional kag non-operational ang amo nga terminal rason nga nalakip sa mga ginsirado.
Sa inisyal naman sang impormasyon sang Bombo Radyo, indi man expired ang prangkisa sang Ticud Terminal.
Una naman nga naghingyo ang mga drivers sang mga van nga ibutang sila liwat sa Ticud Terminal agud ma mahagan-hagan ang volume sang mga pasahero sa Tagbak terminal.
Ginkumpirma man ni Conlu nga ginserbe na sang legal office sang Iloilo City Government ang closure order sa Baldoza terminal sa Lapaz sang nagligad nga Byernes.
Sa bahin naman sang iban nga mga major terminals, may mga improvement na suno kay Conlu ipaanggid sa sitwasyon sa una nga duha ka Lunes sugod sang ginpatuman ang LPTRP.
Ginalauman suno sa PSTMO head nga samtang nagadugang ang ginahatag sang Land Transportation Franchising and Regulatory Board (LTFRB) nga mga special permits sa mga unit sang jeep, madugangan man ang mga city-loopn jeepneys kag mas mapahagan-hagan pa gid ang pagpugok sang mga pasahero.
