ILOILO CITY – Isa ang Ilongga nga si Rabiya Mateo sa mga ginakabig frontrunner sa 1st edition sang Miss Universe Philippines 2020 competition.
Si Rabiya ang tiglawas sang Iloilo City sa Miss Universe Philippines 2020 kag nga graduate bilang cum laude sa kurso nga Bachelor of Science in Physical Therapy sa Iloilo Doctors’ College.
Sa exclusive interview sang Bombo Radyo sa pageant blogger nga si Norman Tinio, iya ginpahayag nga madamo sang mga nagapangibabaw subong nga pageant kag maga-agaway sang korona agud mangin Miss Universe Philippines 2020 kag magatiglawas sang pungsod sa Miss Universe 2020.
“Visayas is very strong. You will be please to know as well that Rabiya Mateo is a strong spoiler in the competition,” pahayag ni Tinio.
Suno kay Tinio, lakip sa mga mapag-on nga kasumpong ni Rabiya amo ang mga titleholders na nga sanday Bb. Pilipinas Globe 2018 Michelle Gumabao sang Quezon City kag Miss Global Beauty Queen Philippines 2018 Pauline Amelinckx sang Bohol.
Magluwas diri, lakip man sa mga nagapangibabaw sa pageant amo sanday Maria Ysabella Ysmael sang Parañaque City, Tracy Maureen Perez sang Cebu City, Apriel Smith sang Cebu Province kag Alaiza Flor Malinao sang Davao City.
Nahibaluan nga si Rabiya ang nagdaog sa Make Up Challenge sang Miss Universe Philippines.
Sa subong nga tuig, mas ginhugtan ang ginpatuman nga health protocol sa mga kandidata bangud sa COVID-19 pandemic.
Ang coronation night sang Miss Universe Philippines 2020 ang patigayunon sa Mall of Asia Arena sa Pasay, Metro Manila sa diin ipasa ni Gazini Ganados sang Talisay, Cebu ang korona sa iya successor.
