ILOILO CITY – Wala ginakabig sang tiglawas sang Iloilo Province nga kakompetensya ang kasubong nga Ilongga nga nagatiglawas sa syudad sang Iloilo sa Miss Universe Philippines 2020.
Sa Good Morning Philippines Program, ginpahayag sang flight attendant nga si Kim Chi Crizaldo nga sa subong, ginatutukan niya ang pre-pageant activities.
Suno kay Crizaldo nga ginbun-ag sa Cavite, Ilongga ang iya iloy kag tumandok sang banwa sang Sara apang malaka lamang sila nga nagapauli sa Iloilo.
Ginpahayag ni Crizaldo nga nahatagan siya sang kahigayunan nga magpakigbahin sa local pageants sa Iloilo tubtub nga naka-angkon sang kahigayunan nga makapasakop sa labing una nga edisyon sang Miss Universe Philippines.
Sa pihak sang tuman ka hugot nga kompetisyon, ginpahayag ni Crizaldo nga wala niya ginakabig nga kakompitensya ang kasubong nga Ilongga nga si Rabiya Mateo nga nagatiglawas naman sa syudad sang Iloilo.
Magluwas sa physical kag emotional training, ginatutukan man sang natungdan ang pagpasangkad sang confidence level agud nga matib-ong sang maayo ang iya adbokasiya may kaangtanan sa public health and sanitation.
Tuman naman ang pagpasalamat sang 23 anyos nga flight attendant sa suporta nga iya nabaton ilabi na nga nalakip siya sa front runners.
Nahibalu-an nga patigayunon ang coronation night sang Miss Universe Philippines 2020 sa Mayo 3 sa Mall of Asia Arena.
