Indi mahimo maggamit sang mga kandidato sa 2025 elections ang short-form video platform nga TikTok para sa ila pagpangampanya.
Suno kay Tiktok Philippines public policy manager Peachy Paderna, indi nila pag-ipaguwa ini nga political advertisements bangud ang ila mayor nga tuyo indi amo nga tungaon ang mga tawo kundi i-promote ang environment nga naga-isa ang mga tawo paagi sa positibo nga mga dayalogo.
Nagtambong kahapon, Oktubre 21, ang mga tiglawas sang amo nga social media platform sa ceremonial signing sang pledge of support sang technology companies sa Commission on Elections (Comelec).
Gin-abi-abi naman sang poll body ini nga tikang bangud nabuhinan ang ila iga-monitor nga social media platform sa tion na sang campaign period.
Sa bahin sang Google, ginsiling man sini nga dumilian man nila ang paid political advertisements sa ila platform.
Apang sa Meta nga amo ang parent company sang Facebook kag Instagram, ginsiling nga tugutan sini ang advertisements agud nga ma-promote ang transparency kag hatagan sang patas nga oportunidad ang tanan nga mga kandidato.
Dugang sang Meta, ginatapna man nila ang troll accounts sa ila platforms paagi sa pag-implementar sang mga tikang kag nagapartner man sa nagkalain-lain nga stakeholders.
Sa second quarter pa lamang sang 2024, may yara na sang at least 1.2-billion nga peke nga accounts sa bilog nga kalibutan nga nakarehistro sa Meta.
Nahibaluan nga sa idalom sang pagsulundan sang Comelec, gina-require ang mga kandidato nga magparehistro sang ila social media accounts kag ginahingyo man nga mag-isyu sang disclosure sa tanan nga election and campaign paraphernalia nga nahimo paagi sa artificial intelligence.#
