Dumilian ang popular short video app nga TikTok sa Albania sa sulod sang isa ka tuig kasunod sang kamatayon sang isa ka teenager sang nagligad nga bulan nga amo ang nagpasaka sang kahangawa sa malain nga impluwensiya sang social media sa kabataan.
Suno kay Prime Minister Edi Rama, natalana nga umpisahan ang pag-ban sa TikTok sa Enero 2025.
“For one year, we’ll be completely shutting it down for everyone. There will be no TikTok in Albania,” pahayag sang opisyal sa meeting sang grupo sang mga ginikanan kag mga manunudlo.
Ini nga tikang sang gobyerno ang kasunod sang natabo nga insidente kun sa diin napatay gid ang 14-anyos nga estudyante nga lalaki matapos ginbuno sang kaangay man nga estudyante.
Base sa local reports, may baisay nga natabo sa tunga sang suspek kag biktima sa social media.
Magluwas diri, may videos pa nga nagguwa sa TikTok kun sa diin may mga menor de edad nga nagpahayag sang ila suporta sa amo nga pagpatay.
Bangud sini, ginbasol sang prime minister ang social media ilabi naang TikTok sa paggatong sang kapintas sa mga kabataan sa sulod kag guwa sang eskwelahan.
“The problem today is not our children, the problem today is us, the problem today is our society, the problem today is TikTok and all the others that are taking our children hostage,” pahayag ni Rama.
Nagsabat naman ang TikTok nga mangayo ini sang klaripikasyon halin sa Albanian government ilabi na bangud wala man sang ebidensya nga may TikTok accounts ang pertpetrator kag ang biktima.
“We found no evidence that the perpetrator or victim had TikTok accounts, and multiple reports have in fact confirmed videos leading up to this incident were being posted on another platform, not TikTok,” suno sa company spokesperson.
Antes sini, may mga pungsod na sa Europa kaangay sang France, Germany, kag Belgium nga nagpatuman sang restrictions sa social media para sa kabataan. Sang damlag lang, gin-aprubahan naman sa Australia ang complete social media ban sa mga kabataan nga wala pa naka-16 anyos nga amo ang ginakabig isa sa pinakamabug-at nga regulasyon nga naga-target sa Big Tech.
