Opisyal na nga ginhingadlan ang winningest coach sa maragtas sang Philippine Basketball Association (PBA) nga si Tim Cone bilang head coach sang national team nga Gilas Pilipinas.
Sandig ini sa anunsyo sang Samahang Basketbol ng Pilipinas, Enero 19, samtang ilabi nga nagahilapit ang pagsinakuay para sa una nga window sang FIBA Asia Cup Qualifiers.
Ginlakip ni Cone sa iya core team ang mga beterano nga sanday Justin Brownlee, June Mar Fajardo, Scottie Thompson, CJ Perez, Calvin Oftana, kag Chris Newsome.
Nalakip man sa lista ang Japan B. League standouts nga sanday Kai Sotto, Dwight Ramos, Carl Tamayo, kag amo man ang Filipino-Cypriot nga si AJ Edu.
Sulod man sa 12-man lineup ang Barangay Ginebra forward nga si Jamie Malonzo kag reigning UAAP MVP Kevin Quiambao sang La Salle.
Si Brownlee sa gihapon ang nakakuha sang slot para sa naturalized player sang Pilipinas apisar nga ginahulat pa ang desisyon sang FIBA kasunod sang paglagbong sini sa drug test sang nagdaog sang championship title sa Asian Games sa China sang Oktubre.
Magluwas nga kilala si Cone nga may 25 na ka titulo sa PBA history, maragtason man ang kada tion nga ginapamunuan sini ang national team sa international games.
Sang 1998 Bangkok Asian Games, nakuha sang Pilipinas ang bronze medal sa idalom sang iya nga liderato. Sang 2019 Southeast Asian Games, gold medalist man ang Gilas kag sa iya man superbisyon nga naagaw liwat sang national team ang korona sa amo nga hinampang sang 2023.
Ang pinakaulihi sini nga nahimo sa national team amo ang pagbulos kay Chot Reyes bilang head coach sang Gilas kag apisar sang malip-ot nga tyempo sang preparasyon bangud sa bag-o lamang natapos nga FIBA World Cup 2023, natigayon nga mangibabaw ang Pilipinas sa Asiad sa China — labing una nga korona sang Pilipinas sa Asian Games sa sulod sang masobra anum ka dekada.
Mangin una nga assignment sang 66-anyos nga coach ang una nga window sang FIBA Asia Cup Qualifiers sa Pebrero kun sa diin atubangon sang Pilipinas ang Hong Kong kag ang Taiwan.
May tyansa man ang Pilipinas nga makapasakop sa Paris Games paagi sa pagdaog sa FIBA Olympic Qualifying Tournament sa maabot nga Hulyo.
Mangin kaupod ni Cone sa team ang manager nga si Ginebra deputy Richard del Rosario.#
