ILOILO CITY – Naalarma si Iloilo City Mayor Jerry Treñas sa sitwasyon sang syudad sang Iloilo kasunod sang ginluthang-patay nga lalaki sa dalan Iznart.
Sa interview sang Bombo Radyo kay Mayor Treñas, iya ginpahayag nga timprano pa natabo ang krimen kag mismo sa downtown pa natigayon ang pagpangluthang.
Suno kay Treñas, sadto pa lang naghingyo na siya sa kapulisan nga ipakita ang police visibility sa mga dalanon sa syudad sang Iloilo ilabi na sa masami ginakadtoan sang mga tawo.
Apang ang nagaguwa subong pahayag sang alkalde nga daw kaangay nga kakululbaan na maglakat-lakat pa sa downtown.
Samtang handa naman nga magbulig ang syudad sang Iloilo sa kun ano man ang kinahanglan sang mga kapulisan ilabi na sa pagpabilin sang peace and order.
Suno kay Mayr Treñas, apisar nga may alokasyon man ang Philippine National Police sa gasolina sang patrol sang pulis, mahimo man sila sa gihapon makapangayo sa Iloilo City Government.
