ILOILO CITY- Makapila na ka beses nga nadakpan sang mga nagabantay nga pulis nagikan sa Cabatauan Municipal Police Station, ang tuyo nga pagpasulod sang canned beers sa hospital room, sang naka-hospital arrest nga si Vicente ‘itik’Espinosa.
Sa interview sang Bombo Radyo kay Police Lt. Joebert Amado, Officer-In-Charge sang Cabatuan Municipal Police Station, iya ginpahayag nga tatlo na ka beses nga nadakpan ang kuntani pagpasulod sang beer sa hulot ni Espinosa.
Suno kay Amado, ang ulihi nga tion nga nagtuyo ang care taker kag therapist sa pagpasulod sang canned beers ang nakasulod sa plastic sang chicheria, ginstapler kag ginscatch tape.
Sa ila pagpangusisa sa duha suno kay Amado, ila ginpahayag nga ginsugo lang sila nga magpasulod sang beer.
Dako naman ang posibilidad suno sa iya, nga mismo si Espinosa ang naga-inom sang mga beers.
Magarequest naman sila sang medical report nagikan sa ospital suno kay Amado kag hulaton ang desisyon sang korte antes magpatigayun sang counter medical check up pinaagi sa isa ka public doctor.
Dako man ang posibilidad suno sa natungdan nga ginasaylo sa lain nga sulodlan ang beer.
Samtang, ginpahayag naman ni Iloilo Police Provincial Office Director Roland Vilela, nga dako ang posibilidad nga mismo si Espinosa ang naga-inom sang beer.
Pahayag pa ni Vilela, kun tinawo niya ang luyag mag-inom, mahimo man ang mga ini nga mag-inom sagwa kag indi na magpasulod pa sang beer sa hospital.
Ang natabo suno kay Vilela ang ground naman ang isaylo sa custodial facility santo sa layi si Espinosa.
