ILOILO CITY- Nakadepende sa kadasigon sang reproduction ang distribusyon sang modules para sa mga estudyante bilang kabahin sang ginapatuman nga blended learning sa tunga sang COVID-19 pandemic.
Ini ang paathag ni Dr. Roel Bermejo, Iloilo Schools Division Superintendent, sa rekomendasyon ni Vice Governor Christine Garin nga kun mahimo nga tingbon ang paghatag sang modules agud indi na magbalik-balik ang mga ginikanan sa eskwelahan agud magkuha kag magpasa sang modules sang ila kabataan.
Suno kay Bermejo, indi tanan nga eskwelahan ang may madasig nga reproduction ukon printing sang modules rason nga wala man nagapalareho ang tagtaganay sa mga estudyante sa diin sa subong, halos kalabanan nga module ang makaigo lang sa isa ka semana kag ibalik naman sa eskwelahan agud bayluhan sang bag-o.
May kaangtanan naman sa ikaduha nga bulan sang blended learning, ginpahayag ni Bermejo nga magapatigayon sila sang agency to agency procurement sa diin 170 million pesos ang nakatigana para sa mga modules.
Nahibaluan nga nagpatigayon sang committee hearing ang Committee on Education nga ginapamunuan ni Vice Governor Garin agud hibaluon ang estado sang Dep-Ed Iloilo sa una nga bulan sang ginapatuman nga blended learning kag ang kahandaan sang ahensya sa maabot pa nga mga binulan.
