Gin-post sang two-time Filipino Olympian nga si EJ Obiena ang mga laragway sa iya madinalag-on nga pagdepensa sa iya titulo sa bag-o lang nagtakop nga 2025 Asian Athletics Championships sa Gumi, South Korea.
Ini ang ikatlo nga sunod-sunod nga gold medal ni Obiena sa amo nga tournament matapos ini nadag-an sang 2019 sa Dubai kag sang 2023 sa Bangkok. Subong nga tuig, ginlaragway niya ini ang kadalag-an nga “title defended in the most thrilling way possible.”
Pareho sila sang iya abyan kag training partner nga Chinese pole vaulter nga si Huang Bokai nga naka-clear sang 5.72 meters sa isa lang ka attempt, pareho man nga nag-skip sa 5.77, kag pareho man nga napaslawan nga makalapaw sa 5.82 mark sa tatlo gid ka beses.
Apang bangud si Obiena ang naka-clear sang 5.77-meter mark sa jump-off, siya ang kampyon kag si Huang ang silver medalist matapos ang masobra man lima ka oras nga kumpetisyon.
Nagpangatlo si Patsapong Amsamarng sang Thailand nga may clearance nga 5.67 meters.
Kaupod sa iya nga legendary coach nga si Vitaly Petrov, magabalik si Obiena sa Europa para sa masako na naman nga schedule sa sini nga bulan.
Lakip sa namensyonar sini nga kumpetisyon amo ang sa Hengelo, Netherlands sa Hunyo 9; sa Oslo, Norway para sa Diamond League; kag sa Wanda Diamond League meeting sa Stockholm, Sweden sa Hunyo 15 kun sa diin yara ang world number one kag back-to-back record holder nga si Mondo Duplantis.
Antes sini, may training man ang Pinoy pride sa Italya.
Ang pinakadaku nga target ni Obiena subong nga tuig amo ang World Championships nga patigayunon sa Japan sa Septyembre.#
