Tito Sotto, ginmanduan sang Korte Suprema nga magsabat sa indirect contempt petition

Ginpasabat sang Korte Suprema si Senate President Vicente “Tito” Sotto III kun ngaa indi siya dapat pag-i-cite for indirect contempt kasunod sang iya komento sa desisyon sang korte sa impeachment kay Vice President Sara Duterte.

10 ka adlaw ang ginhatag kay Sotto agud nga makapasa sang iya nga sabat.

Nag-ugat ini nga kontrobersiya sadtong Hulyo 25,2025 sang nagdesisyon ang Korte Suprema nga unconstitutional kag void ang Articles of Impeachment batok sa Vice President.

Bangud sadto, ginkontra ni Sotto ang desisyon kag nagsiling nga nangin isa na ka imposible nga handum ang impeachment sa VP.

Ginpahayag man anay ni Sotto nga ang kaso ang gindesisyunan sang justices nga indi man pamilyar sa mga pagsulundan sang Kongreso.

Dinekada pa ang hulaton suno sa iya antes matadlong ini nga misinterpretation.

“The Constitution had just been amended unconstitutionally through the Supreme Court’s overreach. It will take decades of retirements to correct this misinterpretation. When the law is clear, there is nothing to interpret, as any first-year law student knows,” kabahin sang statement ni Sotto.

Pahayag pa sini, ang ruling sang Korte Suprema ang maathag nga pagsulod ukon pagpahilabot sa gahum sang legislative branch. Sa amo nga desisyon suno sa iya, naghimo ang Supreme Court sang bag-o nga pagsulundan nga sundon sang Kongreso kun may impeachment.

“The decision is a clear judicial legislation. The SC, as written in their decision, admitted of introducing a rule for Congress to follow in the conduct of impeachment. A clear encroachment on the power of the Legislative branch, as provided for by the Constitution,” suno sa Senate President.

“Impeachment is now an impossible dream,” dugang sini.

Nagpasaka naman sang reklamo sa Korte Suprema ang mga abogado nga sanday Ferdinand Topacio, Harold Respicio, Manuelito Luna, Virgilio Garcia, kag ang negosyante nga si Mary Catherine Diaz Binag.

Ginsiling nila nga ang kritisismo ni Sotto sa ruling sang Korte Suprema ang nagapabuhin sang salig sang publiko sa judiciary.

Gintawag man nila ini nga improper conduct nga nagapakanubo sa High Court.

Sabat naman ni Sotto matapos ang gin-file nga indirect contempt citation batok sa iya, isa ka “nuisance suit” ukon pasabad-sabad lang ang kaso kag isa lamang ka “publicity stunt.” Ginpaathag sini nga wala naga-constitute sang indirect contempt ang indi pag-ugyon sa desisyon sang mga korte.#