ILOILO CITY – Ginpasakaan na sang kaso nga murder ang tiyo nga nagbuno patay sa iya hinablos sa Zone 12 Brgy Calaparan, Arevalo, Iloilo City.
Ang biktima amo si Wilfredo Abantao Jr., 39 anyos samtang ang suspek naman amo si Salvador Abantao, 55 anyos kag lunsay residente sa nasambit nga lugar.
Sa interview sang Bombo Radyo kay Police Staff Sergeant Larry Tabañal, imbestigador sang Arevalo Police Station, iya ginpahayag nga naglabay ang biktima sa balay sang iya abyan kag ginhagad siya nga mag inom sang makahulubog nga ilimnon.
Sang padayon nga naga inom ang biktima, nabatian niya nga nagasinggitan ang suspek nga iya tiyo sa diin ginhambalan siya nga maghipos bangud nga gab-i na.
Nagguwa sa Wilfredo sa balay sang iya abyan sang gilayon siya nga ginbuno siya sang iya tiyo gamit ang 11 pulgada nga kutsilyo.
Na-igo sa tiyan si Wilfredo kag gilayon nga gindala sa ospital apang ginbawian man ini sang kabuhi.
