ILOILO CITY – Patay ang tiyo matapos nga ginluthang sang hinablos sini sa Barangay Palanguia, Pototan, Iloilo kagab-i.
Ginkilala ang biktima nga si Jesus Paraunda, 48, residente sang nasambit nga lugar.
Sa interview sang Bombo Radyo Iloilo, ginpahayag ni PO2 Raffy Gonzales sang Pototan Municipal Police Station nga nagbakal sang ilimnon kag sigarilyo ang biktima kag ginbantayan ini sang suspek.
Nagbaisay ang duha kag ginluthang sang suspek ang tiyo sini sang tatlo ka beses gamit ang 12-gauge shotgun.
Pilas sa tiyan, kilid kag wasak ang baba sang biktima.
Suno sa mga otoridad, may daan na nga hiligut-anon ang suspek kag ang biktima bangud sang away sa duta.
Gilayon naman nga nagpalagyo ang suspek matapos ang insidente.
