ILOILO CITY – Nagakadapat nga mangin mahinalungon kag mag-aligmat ang mga nagatabok sa Sen. Benigno Aquino Jr., Aquino Avenue, Mandurriao, Iloilo City.
Sa interview sang Bombo Radyo kay Mr. Bob Foerster, officer-in-charge sang Transportation Management and Traffic Regulation Office (TMTRO), iya ginpahayag nga nagakadapat nga makahibalo magbasa sang mga road markings kag traffic signs ang mga nagatabok na nasambit nga dalan.
Suno kay Foerster, international standard man ang mga traffic road signs kag nagakadapat nga ginasunod ini sang tanan.
Importante man suno kay Foerster nga mapatuman sang husto ang speed limit ordinance.
Ang rumble strips suno sa natungdan ang pahanumdum sa tagsa ka driver nga may yara sang pedestrian lane sa unahan kag dapat nga maghinay-hinay.
Nagakadapat nga may yara sang klaro nga plano agud indi na masulit pa ang natabo sa mag-asawa nga Osano nga nabunggu-an patay sang Mazda MX5 sports car nga ginamaneho ni June Paul Valencia.
