ILOILO CITY- Nagawangal ang dalagko nga mga grupo sang tobacco farmers bangud sa pagduging sang illegal kag disposable vapes nga ginatudlo amo ang nagapatay sa local tobacco industry bangud ginapanubo sini ang demand para sa tobacco-based nga produkto.
Sa joint statement sang Philippine Tobacco Growers Association (PTGA) kag National Federation of Tobacco Farmers’ Associations and Cooperatives (NAFTAC), ila ginapangabay sa gobyerno nga talupangdon ang pagbaligya sang illegal kag disposable vapes sa pungsod nga amo ang nagapaluya sang baligyaanay sang tabako sang mga mangunguma.
Suno kay Philippine Tobacco Growers Association president Saturnino Distor,ang mas manubo nga demand para sa legal, tax-paid locally produced cigarettes ang magakahulugan sang mas manubo nga financial support para sa industriya sang tabako halin sa local government units nga naga-gamit sang excise taxes nga makolekta halin sa produkto nga tabako.
Pahayag pa sang grupo, kinahanglan istriktuhan sang gobyerno ang pagpatuman sang layi kag regulasyon agud matapna ang baligyaanay sang illegal vape products agud maprotektahan ang kapin sa 2.2 million Filipinos nga nagadepende sa tobacco industry.
Una na ginreport sang Bureau of Internal Revenue nga ang tobacco excise tax ang nagsarurot sang 16 percent sang nagligad nga tuig kun sa diin yara lang ini sa P134.87 billion halin sa P160.55 billion bangud sa mas mataas nga vape consumption kag illicit cigarette trade.
