Nagapanindugan sa gihapon si Prime Minister Yoshihide Suga nga indi dapat pag-ibasol sa Summer Games ang nakit-an nga spike sa coronavirus cases sa Tokyo, Japan.
Duha ka semana antes ang closing ceremony sang hinampang, ang positive cases sa Japan ang yara sa kapin 5,000.
Sang nagtipon ang mga atleta kag nag-inabot sa amo nga pungsod ang delegasyon sang iban nga mga nasyon, ginapahayag nga nag-amat amat man saka ang numero sang kaso.
Isa ka adlaw antes ang pagtakop sang Olimpyada, nagsaka sa 15,743 ang positive cases.
Matandaan nga antes ang pormal nga pag-umpisa sang Tokyo Olympics sang Hulyo 23, nagtipon ang mga protesters malapit sa venue agud pamatukan ang hinampang.
Sa pinal nga adlaw sang Olimpyada, may nabilin gihapon sa sini nga protesters nga nagpakita sa atubang sang Sendagaya station malapit sa Olympic stadium.
Nakasulat sa placard ang mga tinaga nga “Cancel Olympics”. May yara man sang drums kag chants nga nabatian: “Abolish Olympics!”
Isa sa mga nagpabilin nga protester amo ang isa ka female doctor. Suno sa doktor, kun ginaabisuhan sang gobyerno ang mga tawo nga magpabilin sa balay bangud wala na sang bastante nga espasyo sa mga ospital, ngaa Tokyo man sa gihapon ang ma-host sang 2020 Paralympic Games?
Ang Paralympic Games amo ang pinakadaku nga Para sports event sa kalibutan. 1964 sang katapusan nga nag-host ang Japan sang sini nga games. Patigayunon ini sa Agusto 24 tubtub Septyembre 5.
Ang Tokyo ang napaidalom sa fourth state of emergency nga magatakop tubtub sa katapusan sang bulan sang Agusto — tion man kun sa diin full swing ini nga Paralympics.
Ginapahayag sang mga eksperto nga nga posible maglab-ot sa 10,900 a day ang COVID-19 cases sa Agusto 18 kun magpadayon pa ang ini nga current transmission.##
