Ipatuman sang Japan sa kapital sini nga Tokyo ang four-day workweek para sa mga government employees.
May kaangtanan ini sa ginaduso sang gobyerno nga buligan ang mga nagatrabaho nga mga iloy kag ma-boost ang manubo nga fertility rates sa pungsod.
Suno kay Bombo Josel Palma, international correspondent sa Japan, gin-anunsyo sang Tokyo Metropolitan Government nga ang bag-o nga arrangement nga magasugod sa Abril 2025, ang makahatag sa mga empleyado sang tatlo ka adlaw nga off kada semana.
Gin-anunsyo man ang isa ka policy nga magapahanugot sa mga ginikanan nga may kabataan sa grades one tubtob sa three sa elementary schools nga ikompromiso ang ila sweldo para nga temprano pa nga makapauli.
Sa bahin ni Tokyo Governor Yuriko Koike, ginsiling niya nga iga- review ang work styles nga may flexibility agud masiguro nga indi sang mga ini kinahanglan nga isakripisyo ang ila mga career bangud sa mga hitabo kaangay sang childbirth ukon childcare.
Dugang sang opisyal, tion na para sa Tokyo nga maghimo sang inisyatibo agud protektahan kag pasanyugon ang kabuhi sang mga tawo kag ang ekonomiya sa pangkabilugan.
Nahibaluan nga nakalab-ot sa record low ang fertility rate sa Japan sa pihak sang kampanya sang gobyerno nga engganyuhon ang mga tawo nga magpakasal kag magtukod sang pamilya.
