ILOILO CITY – Desidido ang 18 anyos nga tomboy nga magpasaka sang kaso sa tion nga madakpan ang tricycle driver nga nagkumos sang iya nga dughan kaina sang kaagahon sa Jaro, Iloilo City.
Sa interview sang Bombo Radyo kay alyas Dane nga amo ang biktima, upod sila sang iya nga nobya agud kun tani nga idul-ong ini sa ila nga balay sang nagdulog ang pula nga tricycle sa ila nga atubang kag ginpamangkot kun masakay sila nga duha apang nagpangindi ang biktima rason nga naglakat na palayo ang tricycle.
Nakibot na lamang si Dane sang gilayon nga nag U-Turn ang tricycle kag nagpadulong sa ila nga ginatindugan kag ginkumos ang iya nga dughan samtang nagahulat sila sang salakyan.
Ginabanta naga edad 40 anyos ang driver.
Suno kay Dane, lagson pa niya kun tani ang driver apang napaslawan ini bangud sa madasig nga pagpadalagan sang iya nga tricycle.
Gintinguhaan pa nga usisaon ni Dane sa iban nga mga tricycle drivers sa lugar kun bala may nakakilala sa nasambit nga driver apang wala man ang ini sang ihibalo kun sin-o ang nasambit nga lalaki.
Apang nahibaluan ni Dane nga may yara man sang babayi nga nabiktima ang driver sa pagkumos sang dughan santu sa panaysayon sang iban nga mga tricycle drivers.
