Arestado na kag yara na sa kustodiya sang kapulisan ang utod sang anay Presidential Economic Adviser Michael Yang nga si Tony Yang ukon Yang Jian Xin.
Naaresto si Yang sang Miyerkules sang gab-i, Hulyo 9, sang mga elemento sang Pasay City Police matapos maguwa ang warrant of arrest batok sa iya.
Suno sa mga otoridad, ginpasakaan si Yang sang kaso nga perjury, paglapas sa paggamit sang aliases, kag falsification of documents.
Ang arrest warrant ginpagwa sang Municipal Trial Court sang Cagayan De Oro City.
Sa subong, yara na sa kustodiya sang mga kapulisan si Yang samtang ginaproseso ang iya kaso.
Wala pa sang pahayag halin sa kampo sang mga Yang angot sa isyu.
