ILOILO CITY – Ginhingadlan na sang Police Regional Office 6 (PRO-6) ang tatlo ka mga drug personality sa Region 6.
Sa interview sang Bombo Radyo Iloilo, ginpahayag ni PRO6 spokesman Supt. Gilbert Gorero nga ang nasambit nga mga personalidad ang ginakabig nga nagapanguna nga target personality sa bug-os nga Western Visayas.
Ini ang ginalakipan nanday Richard Prevendido, lider sang Prevendido Drug Group nga ginakabig nga no. 1 drug lord sa rehiyon matapos mapatay si Melvin Odicta Sr.; Rolando Torpio sang South Baluarte, Molo, Iloilo City kag Federico Balume sang Estancia, Iloilo.
Si Torpio ang sub-leader sang Odicta Drug Group samtang si Balume ang lider sang grupo nga naangot naman sa drug trafficking, gun for hire kag robbery.
Sadto pa napreso si Balume apang nakapiyansa.
Ginpahayag ni Supt. Gorero nga ang top drug personalities sa rehiyon ang naga-operate sa duha ka probinsiya sa rehiyon ukon masobra pa.
Ang tatlo ang lunsay may arrest warrant nagikan sa korte.