ILOILO CITY – Daku nga kadalag-an para sa singer/songwriter sang ambahanon nga LDR nga mangin 2nd runner-up kag mangin best interpreter sa The 3rd National Bombo Music Festival.
Sa Good Morning Philippines program, ginpahayag ni Jose LG Fuentes, composer kag interpreter sang Cebuano song nga LDR, nga kasubong nga lucky numer niya ang 2 bangud nga sang nakaligad nga tuig, nakuha man niya ang 2nd runner-up.
Suno kay Fuentes, tuman ang iya kalipay bangud nga nahatagan sang pagkilala ang iya original composition nga makahatag man sang inspirasyon sa kadam-an.
Ginpahayag ni Fuentes nga ginakabig niya nga best experience sa Bombo Music Festival amo nga madamu siya sang nakilala nga songwriters.
Sa ginpatigayon nga grand performance night, ginpahayag sang natungdan nga bisan siya ang wala naglaum nga makasulod sa top 3 bangud nga lunsay manami ang performance sang iya mga kasumpong.
Bittersweet para sa composer kag interpreter sang ambahanon nga I’ll be right by your side, ang ila nga pagdaug bilang 1st runner-up sa The 3rd National Bombo Music Festival.
Sa Good Morning Philippines program, ginpahayag ni Patrick Mark Armada sang Janiuay, Iloilo, composer sang I’ll be right by your side, nga kalipay kag kasubo ang iya nabatyagan matapos ang grand performance night.
Suno kay Armada, ang ambahanon nga I’ll be right by your side ang nahanungod sa pagpalangga sa isa ka tawo sa pihak sang kasubo nga hitabo sa kabuhi kasubong na lang sang pagtaliwan sang iloy sang isa sa iya mga abyan nga nagbulig man sa pagbalay sang nasambit nga ambahanon.
Antes pa man ang performance, ginpahayag sang natungdan nga nagpahibalo pa ang iya abyan nga yara sa kritikal nga kondisyon ang iya iloy kag nagapamati sila sa coverage sa Bombo Music Festival.
Sang ginlawag nga sila ang 1st runner-up, nagyuhom kag naghulag pa sang tudlo ang iloy sang iya abyan tubtub nga ginbawi-an sang kabuhi.
Pagkatapos sang grand performance night, gilayon sila nga nagpadulong sa hospital dala ang trophy bilang pagdumdom sa ginakabig nila nga ‘supportive mom’.
Ila man nga ginpromisa nga sa adlaw sang lubong, ila ambahon ang I’ll be right by your side nga tanda sang ila nga pagpalangga sa iloy sang ila abyan.
Samtang, nagapasalamat naman sa Bombo Radyo Philippines si Elmar Jan Bolaño, interpreter sang ambahanon nga I’ll be right by your side.
Suno kay Bolaño nga sadto anay interpreter sang ambahanon nga May paskwa man sa gihapon nga nangin 1st runner-up sa nakaligad nga Bombo Music Festival, nga isa ka dungog para sa iya nga napili-an liwat bilang finalist.
Ginpahayag sang natungdan nga ang iya experience sa Bombo Music Festival ang indi mabayaran sang kwarta kag ini ang lubos niya nga ginapasalamatan sa network.
Handum naman sang magpakaisa nga nagkampeyon sa The 3rd National Bombo Music Festival nga madala sa Zamboanga City ang pagkahilig sa musika.
Sa Good Morning Philippines program, ginpahayag ni Dave Alvarado, composer kag interpreter sang ambahanon nga Vows, nga sa Zamboanga, indi tuman ka kilala ang mga songwriting competition ipaanggid sa Iloilo kag Cebu.
Suno kay Alvarado, magluwas sa kahigayunan nga ginhatag sang Bombo Music Festival sa ila music career, nahatagan man siya sang kahigayunan nga makita sa personal ang iya mga himata sa syudad sang Iloilo.
Ginpahayag ni Alvarado nga luyag niya ipahangop sa kasubong niya nga pamatan-on nga ang songwriting ang isa ka propesyon kag may yara man ini sang maayo nga benepisyo sa ikaayong lawas.
Paagi sa Bombo Music Festival, napamatud-an sang natungdan nga buhi ang Original Pilipino Music.
Samtang, suno naman kay Jhannel Alvarado, composer kag interpreter sang ambahanon nga Vows, tuman ang iya kalipay nga sa lamharon nga edad, nahatagan siya sang kahigayunan nga ipakita ang iya abilidad kag nakahatag sang inspirasyon.
Ginpahayag ni Alvarado nga pagkatapos sang grand performance night, bukas sila nga magpakaisa kaupod ang ila banda sa pagpakigbahin sa masunod nga edisyon sang Bombo Music Festival.
