Humalin sang bata, ginhandum na sang nagpang-walo sa March 2022 Physician Licensure Examination nga mangin isa ka doktor.
Ini amo si Dr. Phoebe Subo nga tumandok sang barotac Nuevo, Iloilo kag nakakuha sang 87.08 % nga rating sa amo nga pasinawan.
Sa interview sang Bombo Radyo kay Dr. Subo, iya ginpahayag nga apisar sang iya ulihi nga pagkuha sang exam, wala man ini naghinusol bangud sa nangin resulta sini.
Suno kay Subo, posible nga mas indi manami ang resulta sang iya exam kun ginpilit niya nga kuhaon ini sang Septyembre sang nagligad nga tuig.
Nahibalu-an nga lima ka adlaw bag-o ang iya nga exam sa amo nga bulan, nagmasakit ini bangud man suno sa iya posible nga nagsupot na ang iya stress kag kakulang sa tulog.
Humalin sang bata pa ini, nakahiligan na niya nga magbasa kag magtuon nga amo man ang rason nga ini ang nangin top student humalin sang Elementarya tubtob sang siya ang nag-gradwar sa West Visayas State University (WVSU)- College of Medicine.
Plano subong ni Subo nga mangin resident doctor sa WVSU Medical Center.
Nagpanugyan man ini sa iban pa nga may tuyo mangin doktor, nga ipabilin ang kapisan sa kaugalingon agud nga malab-ot ang inyo mga handom.
