Iloilo – Gin-turnover na sang Iloilo Police Provincial Office ang Top 9 most wanted person sa Police Regional Office 3 matapos nga nadakpan sa Barangay Ginalinan Viejo, Dingle, Iloilo.
Ang suspek amo si Rebino G. Blanza Jr., 22, sang Barangay San Roque, Lupao, Nueva Ecija.
Nahibaluan nga si Blanza ang utok sa likod sa pagpatay sa 37-anyos nga beautician sang 2015.
Sa interview sang Bombo Radyo kay Police Major Roy Tayona, hepe sang Pototan Municipal Police Station, iya ginpahayag nga paagi sa ginpatigayon nga joint and collaborative efforts sang Pototan, Dingle kag Lupao Municipal Police Station, nangin madinalag-on ang pagdakop sa suspetsado.
Suno kay Tayona, nag-ako ang suspek sa krimen bangud pat-od nga gin-molestiya siya sang biktima.
Sa subong, preso na ang suspek sa kaso nga murder nga wala sang piyansa.
