Nakonsensya gani nga nag-resign ang pinakamataas nga counterterrorism official sang administrasyon ni United States President Donald Trump.
Ginbutang man mismo ni Joseph Kent, director sang National Counterterrorism Center (NCTC), sa iya resignation letter kay Trump nga indi na masarangan sang konsensya sini nga magsuporta sa gyera batok sa Iran.
Ginsiling man sini nga wala man sang pagpamahog nga dala ang Iran sa Estados Unidos sang Amerika.
Suno pa sa iya, klaro nga ang Estados Unidos ang nagsugod sang gyera bangud sang pressure halin sa Israel kag sa iya sini nga “powerful American lobby.”
Bangud sa iya pagbiya sa posisyon, siya ang pinaka-high profile figure halin sa Trump administration nga naghalin agud nga magprotesta batok sa gyera sa Middle East.
Kilala si Kent nga anay myembro sang Green Beret special forces. Napadala siya sa 11 ka beses sa overseas operations kaupod ang militar sang Estados Unidos lakip na ang US Army special forces sa Iraq.
Sang ulihi, nangin paramilitary officer siya sa Central Intelligence Agency (CIA) apang sang ulihi nagbiya na ini sa serbisyo sa gobyerno matapos napatay ang iya asawa nga isa man ka US military officer sa suicide bombing sa Syria sang 2019.
Sa iya post matapos nag-resign, namensyonar man sini ang iya asawa.
“As a Gold Star husband who lost my beloved wife Shannon in a war manufactured by Israel, I cannot support sending the next generation off to fight and die in a war that serves no benefit to the American people nor justifies the cost of American lives,” suno kay Kent.
Matandaan nga gin-appoint ni Trump si Kent sa NCTC kun sa diin nagatrabaho siya sa idalom sang director sang national intelligence. Sila ang naga-analisa kag naga-coordinate sang US response pananglitan may yara sang terrorist threats.
Nagpahayag naman si Trump nga mahina nga tawo si Kent kag maayo man gani nga wala na ini sa serbisyo bangud wala man siya nagaugyon suno sa iya sa assessment sini sa Iranian threat.
Ginbali naman sang White House ang kaundan sang sulat ni Kent kag nagpanindugan nga may mapag-on nga ebidensya si Trump nga may plano ang Iran nga mag-atake sa US gani nga gin-unahan na lang nila ini.
