ILOILO CITY – Patay ang no. 1 drug lord sa Western Visayas nga si Richard Prevendido kag ang bata sini nga si Jayson, sa drug operation nga ginpatigayon kagab-i sa Landheights Subdivision, Barangay Balabago, Jaro.
Alas-9:30 kagab-i sang ginpatigayon sang composite team sang Regional Intelligence Unit, Iloilo City Police Office (ICPO) kag Iloilo Provincial Police Office (IPPO) sa isa ka abandonado nga balay apang bungalow kag duha ka panalgan.
Sa interview sang Bombo Radyo Iloilo, ginpahayag ni IPPO director S/Supt. Marlon Tayaba nga ang operasyon ang para i-serbe kuntani ang arrest warrant batok kay Prevendido.
Apang ginatuyo pa lang nila nga magsulod sa balay, ginpalukpan na sila.
Wala sila sang mahimo suno kay Tayaba kundi depensahan ang kaugalingon.
Natabo ang engkuwentro sang mga Prevendido kag sang kapulisan sa ika-duha nga panalgan sang balay.
Suno kay Tayaba, may ginauyatan nga kalibre .45 nga armas ang drug lord.
Ginpahayag ni Tayaba nga pila na ka bulan nila nga ginapanilagan si Tayaba sa nasambit nga balay.
Gina-arkilahan lang ni Prevendido ang nasambit nga balay.
Ini na suno kay Tayaba ang ika-pito nila nga operasyon batok sa drug lord kun sa diin nag-lab-ot pa sila sa banwa sang Anilao, Banate, Cabatuan, Janiuay, Lambunao kag Barotac Viejo.
Si Prevendido ang may patong sa ulo nga P1.1 million.