ILOILO CITY – Nadakpan na ang isa sa mga top drug personality sa Western Visayas nga si Arturo Balume.
Kaupod ni Balume nga nadakpan sa Barangay Poblacion, Hinobaan, Negros Occidental ang anak sini nga si Arturo Balume Jr.
Ginpahayag sa Bombo Radyo ni Iloilo Provincial Police Office (IPPO) director S/Supt. Marlon Tayaba nga nadakpan ang mag-amay nga Balume sang gintingob nga puwersa sang IPPO, Regional Intelligence Division kag Negros Occidental Provincial Police Office.
Suno kay Tayaba nga nagserbe lider sang operating team, nagapondo sa dalan ang salakyan sang mag-amay sang ini ang ila gin-aresto.
Nadakpan ang duha paagi sa arrest warrant sa kaso nga murder.
Posible suno kay Tayaba nga wala mahibaluan sang mag-amay nga Balume nga ginasundan ang mga ini sang otoridad.
Sumugod sang nadula sa Iloilo ang mga Balume, sa Negros Occidental na ang mga ini nagpanago suno kay Tayaba.
Nahibaluan nga ang mga Balume ang lider sang Balume crime group nga naga-operate sa probinsiya sang Iloilo.
Magluwas sa iligal nga droga, naga-operate man sang gun for hire group ang mga Balume.
Sa listahan sang Police Regional Office 6, top priority target ang mga Balume, kaupod ang isa pa ka drug lord nga si Ernesto Bolivar nga anay sub-group leader ni Richard Prevendido.