Nadiskubrehan sang otoridad nga may torture room kag mga ebidensya sang “love scam” operations sa sulod sang isa ka Philippine Offshore Gaming Operator (POGO) hub sa Porac, Pampanga.
Kadungan ini sang pag-raid liwat sang Presidential Anti-Organized Crime Commission sa amo nga lugar subong nga weekend kun sa diin may nakit-an nga mga computers sa sulod sang building, cellphones, blanko nga sim cards, kag scripts nga nakasulat sa Chinese nga ginapatihan para sa love scam.
Sa ginaalegar naman nga torture room, may yara sang mga baton kag baseball bats.
Sang nagligad, matandaan nga nakakita na ang otoridad sang ebidensya nga may nagakatabo matuod nga torture matapos nga ila na-rescue ang foreigners nga yara sa sulod sang compound.
Sa raid kahapon, Hunyo 8, ang target sang otoridad amo nga maluwas ang dugang nga biktima sang pagpangkidnap bangud sa una nga adlaw nga gin-raid sila, nagpalalagyo ang mga ini kag ginpangbilin na lamang ang naka-posas ukon ila mga bihag.
Natukiban man sang otoridad nga indi lamang workspaces kag residences ang sulod sang POGO compound kundi may yara man sang pila pa ka establisyemento kaangay sang Chinese restaurants, grocery stores nga may Chinese products, may salon, kag may clinic kag pharmacy pa nga may yara sang Chinese-labelled medicines.
May abandonado man nga mga salakyan lakip na ang isa ka sports car.
Magapakig-angot man ang Presidential Anti-Organized Crime Commission sa Philippine Animal Welfare Society bangud may mga amo kag rabbits pa nga nakit-an sa compound kag may yara man sang balatianon nga mga ido kag ang iban sa ila ang nagkalamatay na.
Lima pa lamang sa 46 ka buildings sa sulod sang 10 ka ektarya nga POGO huba sa Porac ang na-search sang otoridad apang wala man nag-set sang timeline kun san-o maubos libot ang pasilidad.
