ILOILO CITY – Padayon nga nagasaka ang numero sang mga nalatnan sang Coronavirus Disease 2019 (COVID-19) sa Iloilo Fish Port Complex kag sa Business Process Outsourcing company nga IQOR.
Sa interview sang Bombo Radyo kay Public Safety and Transportation Management Office head jeck Conlu, as of August 11, naglab-ot na sa 131 ang total COVID-19 cases sa IQOR samtang 129 naman sa Iloilo Fish Port Complex.
Suno kay Conlu, padayon sa subong ang ginahimo nga contact tracing kun sa diin ang Iloilo Fish Port Complex kag IQOR ang may yara sang tuman ka taas nga COVID-19 data.
Ang nagataas nga data suno kay Conlu ang nagakahulugan lamang nga maid-id ang ginapatigayon nga contact tracing.
16 gikan sa 180 ka barangay sa syudad sang Iloilo ang ginpaidalom sa selective lockdown bangud sa nagataas nga numero sang Coronavirus Disease 2019 (COVID-19).
As of August 5, nangin epektibo ang selective lockdown ang Rizal Pala-Pala 1, Rizal Pala-Pala 2 kag Tanza Baybay sa City Proper, North Baluarte kag San Juan sa Molo kag Cuartero sa Jaro.
As of August 10, ginpaidalom man sa lockdown ang Airport kag Guzman-Jesena sa Mandurriao, Simon Ledesma sa Jaro, Calumpang sa Molo kag Rizal Estanzuela sa City Proper.
As of August 11, nalakip sa ginpaidalom sa lockdown ang Bakhaw, Taft North, Q. Abeto kag Bolilao sa Mandurriao kag Tacas sa Jaro.
Ginpahayag ni Conlu nga naglab-ot naman sa 12 ka barangay ang nalakip sa watchlist nga posible ipaidalom naman sa selective lockdown.
Gin-athag sang natungdan nga kun selective lockdown, indi bug-os nga barangay ang ginasirado kundi ang lugar lamang kun sa diin naga-istar ang COVID-19 positive.
