ILOILO CITY – Masobra sa 1.5 million ang kabug-usan nga numero sang mga estudyante nga nagpa-enroll para sa school year nga 2020-2021 sa Western Visayas.
Sa interview sang Bombo Radyo kay Dr. Lea Belleza, Program Supervisor kag tagpamaba sang Department of Education Region 6, iya ginpahayag nga naglab-ot sa 1,516,565 ang kabug-usan nga numero sang mga nagpa-enroll sa pampubliko kag pribado nga mga eskwelahan kag ang nasambit nga numero ang 84.30% sang 2 million nga target.
Suno kay Belleza, apisar nga natapos na sang Hulyo 15 ang enrollment extension, mahimo sa gihapon nga makalagas ang mga transferees kag late enrollees halin sa Kindergarten tubtub sa Senior High school.
Ginpahayag ni Belleza nga madamo pa sa subong ang wala nakahingagaw sa enrollment bangud sa pandemya rason nga magahatag sang konsiderasyon ang Department of Education apang kinahanglan nga makapasa sang nagakaigo nga requirements antes pa man ang pagbukas sang klase sa Agosto 24.
Masako naman ang pagpanghanda sang ahensya para sa pagbukas sang klase kun sa diin ipatuman ang blended learning nga kombinasyon sang online, modular kag TV/Radio learning.
Lakip sa mga update suno kay Belleza amo ang pagpatigayon sang training sa mga manunudlo may kaangtanan sa online classes samtang yara naman sa production tage ang modules nga pagagamiton.
Indi naman required ang tagsa ka manunudlo nga magbakal sang laptop apang mas makapaayo kun may yara sang resources agud nga mangin mahapos ang pagtudlo sa mga estudyante.
Mangin libre naman ang igapanghatag nga modules sa tagsa ka mga estudyante nga wala sang resources kasubong sang laptop kag internet connections.
May kaangtanan naman sa pagpagamit sa mga eskwelahan bilang facility quarantine, ginpahayag sang natungdan nga santo sa kasugtanan, kutub lang kun tani sa Hunyo 15 ang kontrata apang ginpahayag sang natungdan nga wala siya sang tul-id nga ihibalo tuhoy sa kaundan sang sulat nga ginpadala ang mga Local Government Unit sa DepEd central Office.
