ILOILO CITY – Wala sang maayo nga paathag sa mga opisyal sa Barangay Concepcion, Iloilo City Proper kun ngaa nalakip ang ila barangay sa ipaidalom sa total lockdown epektibo subong nga adlaw.
Sa interview sang Bombo Radyo kay Punong Barangay Madona Martin, iya ginpahayag nga subong nga aga, wala pa niya gin-anunsyar ang pagpatuman sang total lockdown sa mga residente.
Una diri, gin-implementar ang surgical lockdown sa Zone 4 sang nasambit nga lugar bangud may 8 ka kaso sang COVID-19. May tag-isa man ka balay sa Zones 3 kag 6 nga ginlockdown matapos nakarecord sang COVID-19 case sa nagapuyo nga pamilya.
Suno kay Martin, napatigayon naman sang City Health Office ang disinfection sa nasambit nga mga zona.
Kun ipatuman ang total lockdown suno sa opisyal, apektado ang tanan nga tawo sa bilog nga barangay kag mangin huol ini sa ila trabaho kag pagginawi apisar wala man sang kaso sang COVID-19 sa ila ginatiniran nga lugar.
Ginpahayag sang punong barangay nga ginpalab-ot na niya ini nga concern sa ila Association of Barangay Captains (ABC) President bangud wala man siya nakahibalo kun kinahanglan pa ang mga pulis kag iban nga augmentation force sa lugar.
Nagamato-mato naman ang mga residente sa paghimos sang ila tagsa ka kinahanglanon. #
