Temporaryo nga suspendihon ang operasyon sang tourism facilities, recreation kag accommodation establishments sa probinsya sang Iloilo umpisa Abril 1 tubtob 4.
Ini matapos nagpapanaog sang Executive Order. No. 114 si Iloilo Governor Arthur Defensor Jr. kasunod sang kahangawa sa posible nga pagtimbuok sang COVID-19 cases sa Iloilo Province kadungan sang Semana Santa.
Sa interview sang Bombo Radyo kay Iloilo Governor Defensor, iya ginpahayag nga nasaad man sa amo nga pagsulundan nga ginadumilian ang swimming sa public beaches kag inland waters.
Ang tourism, recreation, kag accommodation establishments nga suspended ang operation sa probinsya sang Iloilo amo ang masunod:
- beach resorts;
- inland resorts;
- water parks;
- amusement parks;
- ecological parks;
- hotels;
- tourist inns;
- motels;
- pension houses;
- apartment hotels;
- private homes used para sa homestay;
- ecolodges;
- serviced apartments;
- condotels; kag
- bed and breakfast establishments
Yari naman ang mga facilities kag venues nga suspendihon man ang operasyon sa probinsya sang Iloilo sa Abril 1-4:
- swimming pools;
- cottages;
- beaches;
- playgrounds;
- bars;
- game rooms;
- function rooms;
- dining halls;
- food stations; kag
- dance halls
Suno kay Defensor, ginamanduan man ang Local Task Forces sang Iloilo Province nga magpatigayon sang patrolya kag inspeksyon sa Semana Santa kag hugot nga ipatuman ang community quarantine measures lakip na ang minimum public health protocol.
Nagpanugyan man ang gobernador sa publiko nga nagakadapat nga magpalamandong kag magpabilin sa balay kaupod ang pamilya agud maghiwat sang mas makahulugan nga pagdumdom sang Semana Santa.
