ILOILO CITY – Ginrekomendar sang Department of Tourism (DoT) Region 6 sa local government sang northern Iloilo nga temporaryo ipasirado ang Isla Gigantes sa banwa sang Carles, Iloilo.
Sa interview sang Bombo Radyo, ginpahayag ni DoT-6 director Atty. Helen Catalbas nga sa iya pagpakigsapol sa tourism officers kag mga opisyal sang Northern Iloilo, ginrekomendar sini nga ipasirado temporaryo ang Isla Gigantes.
Kinahanglan anay suno kay Atty. Catalbas nga atindiron ang problema sa sanitation.
Santu sa ocular inspection sang DoT kag Department of Environment and Natural Resources (DENR), natukiban suno kay Atty. Catalbas nga madamo sang environmental issues sa isla kaangay sang mga scallops nga apisar may unod pa, ginatambak malapit sa tangkal sang baboy.
Madamo sang mga pamalay suno kay Catalbas ang wala man sang comfort room (CR).
Apang gin-athag sang DoT nga yara sa kamot sang local government units (LGU) ang pagdesisyon.
Sa ti-on nga magpasugot ang LGU, plano nila suno kay Atty. Catalbas nga ipatuman ang closure sa masunod nga tuig, kadungan sang rainy season kun sa diin indi madamo ang nagapadulong nga mga turista sa Isla Gigantes.
Ang Isla Gigantes ginkilala sang Forbes magazine nga “one of the most beautiful places in the world”.