DAEGU CITY, SOUTH KOREA – Apektado ang trabaho kag negosyo sa Daegu City, North Gyeongsang, South Korea bangud sa outbreak sang Coronavirus Disease 2019 (COVID)-19.
Sa exclusive interview sang Bombo Radyo kay Bernadeth Almores, Overseas Filipino Worker sa nasambit nga lugar, ya ginpahayag nga kalabanan sa mga negosyo sa Daegu City kag sa probinsya sang North Gyeongsang ang ginpasirado samtang ang iban naman nga kompaniya ang nagpatuman sang limited duty hours.
Suno kay Almores, naglapta ang COVID-19 bangud nga nagkampante ang South Korean government nga matapna gilayon ang nasambit nga virus apang sa wala ginalauman, madamo ang nalatnan.
Sa pagkamatuod suno kay Almores, apisar nga may yara sang outbreak sa China kag sa iban nga lugar sa kalibutan, wala nagpatuman sang travel ban ang South Korea bangud nga nakahibalo ang gobyerno kun ano ang ila kapasidad.
Sa subong, ginakulang ang supply sang facemask, alcohol, sanitizers kag pagkaon bangud sa panic buying samtang kasubong naman nga ghost town ang Daegu City bangud nga wala na sang may nagabyahe nga public transport system magluwas sa train.
Sa pihak sang kahangawa, mismo ang South Koreans ang kampante nga masarangan sang gobyerno nga matapna ang outbreak paagi sa mga lihok nga ginapatuman kasubong sang istrikto nga pagpatuman sang lock down sa Daegu City, padayon nga pag-disinfect sang mga pampubliko nga lugar kag ang pag-trace sa iban pa nga infected persons.
